АҚШ суди шомон кийимида жорий йил бошида Капитолийга ҳужумда қатнашган аризоналик Жейкоб Ченслини уч йилу беш ойлик қамаш ҳақида ҳукм чиқарди.
Прокурорлар шомонни тўрт йилдан кўпроқ муддатга озодликдан маҳрум этишни сўрашган. Адвокатлар бу муддатни 10 ой билан чеклашни сўрашаётган эди. Уларнинг иддаосича, Ченсли шизофрения, асаб бузилиши ва депрессиядан азият чекиб келади. Судланувчи маҳкамада айбини бўйнига олган.
Капитолийга ҳужум чоғида Ченсли антиқа уст-боши ва шохдор мўйнали қалпоғи билан эсда қолган. У сенатда вице-президент Майк Пенснинг столи олдида суратга тушган. Бу сурат ОАВ ва ижтимоий тармоқларда кенг тарқалган.
Жейкоб Ченсли 9 январь куни қўлга олинган. Ўша куннинг ўзида унга Капитолийга куч билан кириб олиш ва жамоат тартибини бузиш айблови қўйилиб, кейин ҳибсга олинган.
АҚШнинг ўша пайтдаги президенти Дональд Трампга тарафдор бўлган бир гуруҳ шахс 6 январь куни демократ Жо Байденнинг 3 ноябрь кунги президент сайловида қозонган ғалабаси тасдиқланиши маросимини бузиш учун Капитолий биносига бостириб кирган эди. Ҳужумдан сўнг полиция зобити дохил беш киши ўлгани маълум бўлган.
Капитолийдаги воқеалардан олдинроқ ўша куннинг ўзида Дональд Трамп Оқ уй яқинида ўз тарафдорлари митингида нутқ сўзлаган. Ўз сўзида у президент сайлови натижалари сохталаштирилгани ҳақида ўз юристлари судларда исботлай олмаган иддаоларни тилга олган.