Америкалик конгрессменлар ўтирадиган Капитолий биноси штурмида иштирок этган Гай Реффитт суд ҳукми билан 7 йилу 3 ойга қамалди. Бу ҳақда АҚШ Адлия вазирлиги ўз сайти орқали маълумот тарқатди. Бу мазкур иш бўйича шу кунгача айбдорларга берилган энг катта қамоқ муддатидир.
Март ойида Реффитт жиноий айбловнинг бешта банди бўйича айбдор деб топилган. Хусусан, у жамоат тартибини бузганликда, 2021 йилнинг 6 январь куни содир бўлган тартибсизлик чоғида Капитолий ҳудудига тўппонча олиб кирганликда ҳамда расмий муноқашага тўсқинлик қилганликда айбланган.
Колумбия округи бўйича прокурор Мэттью Грейвсга кўра, Гай Реффитт 6 январь куни Капитолийга қуролланиб, зўравонликка чоғланиб келган.
“Реффиттнинг сўзларига кўра, унинг мақсади “кун охиригача” Капитолийни эгаллаб олиш бўлган”, деган прокурор.
Гай Реффитт ўтган йилнинг январь ойи бошида Вашингтонда кузатилган тартибсизликлар туфайли айблов эълон қилинган 700 дан зиёд кишидан бири бўлиб ҳисобланади.
Ўшанда АҚШнинг собиқ президенти Дональд Трамп тарафдорларининг Капитолий биносига ҳужуми чоғида ўнлаб полициячи калтакланган ва тан жароҳати олган. Ўша кунги тартибсизликларда беш киши ҳалок бўлган. Капитолий биносига етказилган зарар эса 1,5 миллион долларга баҳоланган.