АҚШ президенти Жо Байден 2024 йилги президентлик сайловида иккинчи муддатга номзодини қўйишини эълон қилди.
“Ҳар бир авлодда демократияни, ўзининг асосий эркинликларини ҳимоя қилишга тўғри келган пайтлар бўлади. Мен бунинг бизники эканига ишонаман. Мана нима учун мен АҚШ президенти сайловида иштирок этмоқчиман. Келинг, бошлаган ишимизни тамомлайлик”, деб ёзди Байден Твиттерда.
Every generation has a moment where they have had to stand up for democracy. To stand up for their fundamental freedoms. I believe this is ours.That’s why I’m running for reelection as President of the United States. Join us. Let’s finish the job. https://t.co/V9Mzpw8Sqy pic.twitter.com/Y4NXR6B8ly
— Joe Biden (@JoeBiden) April 25, 2023
АҚШ вице-президенти Камала Ҳаррис ҳам 2024 йил сайловда Жо Байден билан биргаликда ўз номзодини қўйишини билдирди.
Муҳтамал иккинчи муддат охирида 86 ёшга кирадиган Байден унинг биринчи муддатда қонунчиликда эришган ютуқлари ва Вашингтондаги 50 йиллик иш тажрибаси унинг ёшидан кўра кўпроқ аҳамиятга эга бўлиши умид қилмоқда.
Демократик партия ичида Байденнинг жиддий рақиби йўқ, бироқ мамлакатда жиддий бўлиниш бўлиб турган бир шароитда у президент курсисини сақлаб қолиш учун оғир курашга кириши лозим бўлади.
Байден бундан роппа-роса 4 йил муқаддам – 2019 йилнинг 25 апрелида Оқ уй учун курашга киришишини эълон қилган эди. Ўшанда у Дональд Трампнинг турбулент президентлиги манзарасида “мамлакат руҳи”ни муолажа қилишни ваъда қилган, бироқ бу мақсадга ҳалигача эришилгани йўқ, дея қайд этган “Америка овози”.
Байденнинг ўз партиясидаги сиёсий вазияти ўтган йили Конгрессга бўлган оралиқ сайловлар чоғида демократлар кутилганидан кўра юқорироқ натижа кўрсатганидан кейин барқарорлашган.
Республикачилар орасида президентликка номзодлар орасида 76 ёшли Трампга кўпроқ эътибор қаратилмоқда. Бу 2020 йилдаги жўшқин кампания давом этиши учун имконият яратади. Айни пайтда Трамп жиддий ғовларга дуч келган, жумладан у АҚШда жиноий айблов илгари сурилган илк собиқ президентга айланган.
Жо Байден 2021 йилда АҚШнинг 46-президенти ўлароқ сайланган. У Қўшма Штатлар тарихида энг ёши катта давлат раҳбари бўлиб ҳисобланади.