Дори-дармон ишлаб чиқарувчи AstraZeneca ширкати Оксфорд университети билан ҳамкорликда коронавируснинг Омикрон штаммига қарши вакцина ишлаб чиқариш устида иш бошлаганини билдирди.
AstraZeneca Оксфорд билан аденовирус тамойили асосида ишлаб чиқадиган дори коронавируснинг бошқа янги штаммларига нисбатан ҳам самарали бўлишини режалаштирмоқда.
Аввалроқ Pfizer / BioNTech ва Moderna ширкатлари ҳам Омикрон штаммига қарши вакцина ишлаб чиқариш лойиҳаси устида иш бошлаганларини эълон қилган эди. Moderna ўз вакцинасининг клиник синовлари 2022 йил аввалида бошланишини маълум қилди.
Катта еттилик давлатлари соғлиқни сақлаш вазирлари “Омикрон” вариантини "жаҳон соғлиқни сақлаш тизими учун энг катта таҳдид" деб атади.
Жаҳон соғлиқни сақлаш ташкилоти Омикрон штамми бошқа штаммларга қараганда тезроқ тарқалишини, аммо бу штамм ўта хавфли эмаслигини маълум қилган. Шу кунгача коронавируснинг мазкур штамми 63 давлатда аниқланди.