АҚШ президенти Жо Байден Қўшма Штатларнинг махсус вазифаларни бажарувчи бўлинмаси 3 февралга ўтар кечаси Идлиб вилоятида (Сурия) кечган жангларда “Ислом давлати” экстремистик гуруҳи лидери Абу Иброҳим ал-Ҳошимий ал-Қурайшийни ўлдирганини маълум қилди.
“АҚШ Қуролли кучлари менинг фармойишимга кўра Сурия шимоли-ғарбида муваффақиятли аксилтеррор амалиётини ўтказди”, дейилган президент баёнотида. Байден “амалиётда иштирок этган барча америкаликлар уйларига қайтишган”ини қўшимча қилган.
Баёнотга кўра, ҳарбий амалиётга доир бошқа тафсилотлар кейинроқ очиқланади.
Associated Press агентлигининг қайд этишича, аввалроқ АҚШ Мудофаа вазирлиги Сурияда рейд ўтказилишини тасдиқлаган, бироқ унинг мақсадига ойдинлик киритган эмас. Агентлик дастлабки маълумотларга кўра 13 киши, жумладан олти бола ва тўрт аёл қурбон бўлганини хабар қилган. Отишма ва портлашлар икки соатдан ортиқ давом этган. Америкаликлар Туркия чегарасига яқин Атма шаҳрига вертолётларда етиб келиб, ИД етакчиси борлиги тахмин қилинган уйни қуршовга олганлар.
Reuters хабар агентлиги ҳам 13 киши қурбон бўлгани ҳақида ёзган. Америкалик ҳарбийлар овоз кучайтиргичлар орқали аёллар ва болаларни ҳудудни тарк этиш тўғрисида огоҳлантиришган.
Абу Иброҳим ал-Ҳошимий ал-Қурайший 2019 йил октябрида Суриянинг айни ўша ҳудудида АҚШ ўтказган амалиёт натижасида ИДнинг аввалги раҳнамоси Абу Бакр ал-Бағдодий ўлдирилганидан сўнг экстремистик гуруҳ раҳбарига айланган эди.