АҚШ президенти Жо Байден 7 февраль оқшомида Конгрессда мамлакатдаги аҳвол тўғрисидаги йиллик ҳисоботи билан чиқиш қилди.
Мазкур нутқнинг катта қисми Байден президентлик қилган икки йил ичида эришилган иқтисодий ютуқларга оид ҳисобот ўлароқ янгради. АҚШ президенти бу вақт оралиғида 12 миллион ишчи ўрни яратилгани, ишсизлик ҳолати сўнгги 50 йил ичида энг паст даражага тушгани, сўнгги ойларда ўрта синф даромади ошиши баробарида инфляция даражаси пасайгани, ўтган йил бошида ошиб кетган ёқилғи нархлари ҳам ҳозирга келиб анча арзонлагани ҳақида билдирган.
Жо Байден ўз ташаббуси билан киритилган мамлакат инфратузилмасига инвестициялар киритиш тўғрисидаги қонунни эслатиб, унинг бандлик ошишини таъминлаш ҳамда янги иш ўринлари яратишга кўмаклашишини қайд этган.
Президентга кўра, унинг мақсади ўрта синф вакилларини дастаклаш бўлиб ҳисобланади.
“Режамдан мақсад унутилган шаҳарлар ва одамларга инвестиция киритишдир... Биз ҳеч кимни ортда қолдириб кетмайдиган иқтисодиётни барпо этмоқдамиз”, деган Байден.
Президент янги ижтимоий харажатлар дастурини олға суриб, буни амалга ошириш учун корпорациялар ҳамда даромади юқори бўлган америкаликлардан олинадиган солиқларни кўтаришни таклиф қилган.
“Бадавлат америкаликлар ва корпорациялар ўз улушини тўлаши лозим”, деган Байден нефть нархи юқорилигидан улкан даромад олаётган ҳамда мамлакатда нефть ишлаб чиқариш учун сармоя ётқизишни истамаётган ширкатларни айблаган.
АҚШ президенти нутқининг халқаро алоқаларга оид қисми унча катта бўлмаган. Жо Байден Россия қўшинларининг Украинага бостириб киришини Америка ва дунё учун тарихий синов, деб атаган. Президентга кўра, АҚШ бу масалада лидер ролини ўз зиммасига олиб, НАТОни жипслаштириб, халқаро коалиция тузишга муваффақ бўлган ҳамда украиналиклар билан биргаликда агрессорга қарши чиққан. Байден нутқ чоғида залда бўлган Украинанинг АҚШдаги элчиси Оксана Маркаровага бевосита мурожаат қилиб, Америка Украинани қанча керак бўлса, шунча дастаклашини ваъда қилган.
Республикачиларнинг жавоб сўзида Арканзас штати губернатор Сарра Хаккаби Сандерс президент Байден ва Демократлар партияси “америкаликларнинг ишончини оқламаган”ини таъкидлаган.
“Улар бу ҳақда билишади, сиз бу ҳақда биласиз, ўзгариш қиладиган вақт келди”, деган Хаккаби ўз сўзини қувватлаш учун мамлакатда инфляция даражаси юқорилиги, жиноятчилик кўпайгани ва Хитой томонидан таҳдид ошиб бораётгани каби масалаларга эътибор қаратган.
Шарҳловчиларнинг кўпи Байденнинг сешанба оқшомидаги нутқи иккинчи президентлик муддатига даъвогар сиёсатчининг нутқига ўхшаб кетганини қайд этишган.