Қирғизистон пойтахти Бишкек шаҳрида 26 октябрь куни номаълум шахслар SuperTV телеканали журналисти Бактурсун Жоробековни калтаклаб кетишган. Бу ҳақда телеканалга қарашли Serep.kg сайти хабар қилди.
Журналистга кўра, у дорихонадан чиққан пайтда номаълум эркаклар ёнига келиб, юзи ва бошига мушт туширишган. Жоробеков ўзининг калтакланишини касбий фаолияти билан боғламоқда.
“Улардан бири: “Бу мени тасвирга олган SuperTV журналисти”, деди. Ҳушимни қачон йўқотиб қўйганимни билмайман. Уйга келганимда соат 04:30 бўлган экан”, дея иқтибос келтирган журналистнинг сўзларидан сайт.
Журналист ҳодиса юзасидан Бишкекнинг Ленин туман ички ишлар бошқармасига ариза ёзган.
Туман ИИБ матбуот хизмати Озодликнинг қирғиз хизматига Жоробековнинг калтакланиши юзасидан кейинроқ маълумот берилишини билдирган.
Сўнгги пайтларда Қирғизистонда журналистлар ва оммавий ахборот воситалари фаолиятига тўсқинлик қилиш ҳолатлари кўпайган. Куни кеча Маданият вазирлиги “Азаттиқ Медиа” сайти ишини икки ойга тўхтатишга оид қарор қабул қилгани ҳақида маълум бўлган эди.