Шавкат Мирзиёев 5 февраль куни ўтган видеоселекторда 2023 йилда вояга етмаганлар томонидан уч ярим мингта жиноят содир этилганини қайд этди. Улардан 2280 нафарини мактаб ўқувчилари ташкил қилади. Бу ҳақда президент матбуот хизмати маълум қилди.
“Сўров мактаб директоридан бўляпти, лекин Болалар масалалари бўйича миллий комиссияга масъул ҳокимлар ҳар ҳафта битта мактабга бориб, ўқувчиларни шароити ва тарбияси билан шуғулланмаяпти”, деб айтган президент.
Мирзиёев шу муносабат билан мактаблардаги инспектор-психологлар штатини Ички ишлар вазирлигидан Миллий гвардия тизимига ўтказишга кўрсатма берди.
Президентга кўра, ўқувчиларни ватанпарварлик руҳида тарбиялаш орқали уларда “ҳуқуқбузарликка қарши иммунитет” яратиш бўйича тизим “ташкил этилиши лозим”.
Йиғилишда маҳалла раислари ҳар ой мактабларда ота-оналар билан учрашиб, маҳалла ва мактабдаги муҳитни муҳокама қилиши мақсадга мувофиқ экани кўрсатиб ўтилди.
Мактабларда таниқли шоир ва ёзувчилар, спортчилар, фахрийлар, жамиятда обрўга эга инсонлар билан учрашувларни кўпайтириш лозимлиги айтилди.
Болалар тарбиясини яхшилашга, ота-оналар дунёқарашини кенгайтиришга хизмат қиладиган миллий контентни маҳалла ва таълим муассасаларига етказиб туриш топширилди.
Ўзбекистонда ўсмирлар бир йилда 3,5 мингта жиноят содир этди
Иллюстратив сурат.