Британия ҳукумати тез орада Россиянинг “Вагнер” хусусий ҳарбий ширкатини террор ташкилоти деб эълон қилиши кутилмоқда. Бу ҳақда 6 сентябрь куни Буюк Британия Ички ишлар вазирлиги (Home Office) маълумот тарқатди.
Мазкур фармойиш расман 13 сентябрь куни кучга кириши керак. Бу санадан кейин “Вагнер” ХҲШ рамзларини омма олдида намойиш қилиш дохил бу ташкилотга кўрсатилган ҳар қанақа қўллов Британияда жиноят бўлиб ҳисобланади ва бу ҳаракатни содир этган шахс қамалади.
Ички ишлар вазири Суэлла Браверман “Вагнер” гуруҳини “шафқатсиз ва бузғунчи” деб атаб, мазкур гуруҳ хорижда Владимир Путин бошчилик қилаётган Россиянинг “гурзигарони” ўлароқ ҳаракат қилаётганини қайд этган. “Украинада, Яқин Шарқда ва Африкада ХҲШ ёлланмалари талончилик, қийноқ ва ваҳшиёна қотилликларда иштирок этишган”, дейилган ИИВ баёнотида “уларнинг террорчи экани кундай равшан” экани урғуланади.
“Вагнер” ХҲШни террор ташкилотлари рўйхатига киритиш эҳтимоли Британияда сўнгги бир неча ойдан буён муҳокама этилмоқда. Лондон қарори “Вагнер” асосчиси Евгений Пригожин ва ХҲШнинг қатор командирлари номаълум сабабларга кўра Россияда авиаҳалокатга учраб, ҳалок бўлганидан бир неча ҳафта ўтиб эълон қилинди.
Пригожин ўлимидан сўнг ОАВда Россия Мудофаа вазирлиги Африка мамлакатларидаги, хусусан россиялик ёлланмалар фаол ҳаракатланган ЖАР, Мали ва Буркина-Фасодаги “Вагнер” ХҲШга алоқадор активларни ўз назорати остига олиш истагида бўлгани ҳақида хабарлар пайдо бўлган. Бу давлатларга Россия мудофаа вазирининг ўринбосари Юнусбек Евкуров борган. Россия қонунларига кўра номашруъ бўлган ХҲШнинг тақдири эса Пригожиннинг ўлимидан кейин мавҳумлигича қолмоқда. Гуруҳнинг бир неча минг жангчиси, афтидан, ҳалигача Беларусдаги жамлоқда қолмоқда, Сурия ва Африканинг қатор мамлакатларида ҳам вагнерчилар бор.
“Вагнер” ХҲШ ёлланмалари ўзлари юрган мамлакатларда, хусусан Украинада қатор жиноятларни содир этганликда бир неча бор айбланган. Gulagu.net лойиҳаси чоршанба куни ХҲШ томонидан ёлланган икки собиқ маҳкумнинг ҳикоясини ёйинлаган. Улар иддаосича, ёлланмалар Пригожин ва ХҲШнинг бошқа командирлари буйруғига мувофиқ Украинада тинч аҳоли вакилларини ўлдиришган. Уруш шароитида собиқ маҳкумлар баён қилган бу маълумотларни тезкор равишда текширишнинг имкони йўқ.