Британия Россия Украинага бостириб кириши муносабати билан санкция эълон қилинган шахслар рўйхатини кенгайтирди. Рўйхатга яна 42 киши, жумладан, адлия вазири Константин Чуйченко, миллиардер Алишер Усмоновнинг икки жияни ва Россия вилоятларининг 29 раҳбари киритилди.
Британия ҳукуматининг билдиришича, Усмоновнинг жиянлари Санжар ва Сарвар Исмоилов Лондоннинг энг қиммат икки туманида қатор турар жой биноларига эгалик қилади. Улар Усмоновнинг синглиси Гулбаҳор Исмоилованинг ўғилларидир.
Бундан ташқари Россия ҳукуматининг Sputnik International ахборот агентлиги бош муҳаррири Антон Анисимов ва Россиянинг RT ва “Звезда” телеканаллари билан ҳамкорлик қилувчи британиялик видеоблогер Грэм Филлипсга ҳам санкциялар жорий этилди.
Рўйхатга киритилганларнинг Британиядаги активлари музлатилади. Британия санкциялари офшор ширкатларни рўйхатга олувчи қатор давлатлар адлия тизими томонидан, жумладан, Мэн оролида мажбурий ҳисобланади.
Алишер Усмонов Россиянинг Украинага тажовузи ортидан Россиянинг президент Путинга яқин деб ишонилган бошқа олигархлари қаторида ЕИнинг санкциялар рўйхатига киритилган эди.
Санкциялар доирасида миллиардернинг Европа Иттифоқига кириши тақиқланган, Иттифоқ ҳудудидаги активлари эса музлатилган.
Март ойи бошида Франция ҳукумати Алишер Усмоновга алоқадор 2 та вертолётни ҳибс қилди. Шунингдек, Германия ҳукумати Гамбургдаги кемасозлик заводида Алишер Усмоновнинг 600 миллион долларлик “Дилбар” яхтасини тўсиб қўйгани хабар қилинди. Италия нашрлари эса, Сардиниядаги Усмоновга тегишли вилла хатлангани ҳақида хабар берди.
Британия Ташқи ишлар вазирлигининг билдиришича, Алишер Усмонов март ойида ЕИ санкциялар рўйхатига киритилганидан сўнг бир қатор активларини синглиси Гулбаҳор Исмоилова номига ўтказиб берган.
Шундан сўнг Исмоилованинг Британиядаги барча активлари музлатилган ва унга мамлакатга кириш тақиқланган. Гулбаҳор Исмоилова Тошкентдаги Федорович номидаги клиник санаторий акцияларининг 82,1 фоизига ҳам эгалик қилади.
8 апрель куни Европа Иттифоқи Кенгаши Алишер Усмоновнинг яна бир синглиси Саодат Нарзиевани ҳам санкциялар рўйхатига киритди. Коррупция ва уюшган жиноятчиликни ўрганиш маркази (OCCRP) Нарзиева Швейцария банкларидаги умумий қиймати 2 млрд доллардан кўпроқ 27 дан ортиқ банк ҳисобларининг бенефициари экани ҳақида ёзган.