“Бухоро–Урал” магистраль газ қувурининг Бухоро вилоятидан ўтган қисмида 10 февраль куни авария ва унинг ортидан ёнғин рўй берди.
Ижтимоий тармоқларда тарқалган видеолавҳаларда олов юқорига ўрлаётганини кўриш мумкин.
Бухоро вилояти Фавқулодда вазиятлар бошқармасининг маълум қилишича, авария Газли магистраль газ қувурлари бошқармасининг диаметри 1020 мм бўлган 26 кг босим остидаги қувурининг ер остидан ўтган 106-километрида рўй берган.
ФВБ ҳодиса соат 11:26 да рўй бергани ва соат 11:30 да мурватлар ёпилиб, қолдиқ газлар чиқиб кетганини билдирган.
Маҳаллий матбуот мурватлар ёпилганидан кейин ҳам қувурда қолган газ назорат остида чиқишда давом этгани ҳақида хабар берган.
ФВБ қайдича, ёнғин натижасида жабрланганлар ва тан жароҳати олганлар йўқ. Авария рўй берган жойга энг яқин (40 км) аҳоли маскани Ромитан тумани Қизилработ МФЙдир.
Маҳаллий Телеграм каналлар вилоятдаги метан шохобчалари ёпилгани ҳақида ёзган.
Энергетика вазирлиги матбуот хизмати ҳам дастлабки баёнотида ҳудуддаги метан газ тўлдириш шохобчалари фаолиятига вақтинча чеклов киритилишини билдирган, аммо кўп ўтмай вазирлик ахборотининг ушбу қисми ўчириб юборилган.
Бир муддат ўтиб, Энергетика вазирлиги барча ҳудудлардаги метан шохобчалар “одатий режимда ишлашда давом этиши”ни маълум қилган.
Газли магистраль газ қувурлари бошқармаси “Ўзтрансгаз” ширкатининг таркибий бўлинмаси бўлиб, минтақада магистраль газ қувурларини тасарруф этиш, техник хизмат кўрсатиш ва таъмирлаш билан шуғулланади. Бошқарма маҳаллий ва экспорт учун табиий газни етказиб берувчи муҳим газ транспорт магистралларини бошқаради.
Озодлик аввал хабар қилганидек, Энергетика вазири Жўрабек Мирзамаҳмудов 2024 йил октябрь ойида “Газли” ва “Хўжаобод” ерости газ омборларида қиш мавсуми учун 5,1 млрд куб метрдан ортиқ газ захираси жамланганини маълум қилганди.