Ўзбекистон болалар омбудсмани чақалоқни турли усуллар билан мунтазам қийнаб келган “ота деб аталаётган шахс”га нисбатан жиноят иши қўзғатилганини маълум қилди.
Бундан аввалроқ ижтимоий тармоқларда соқол қўйган, кўринишидан бақувват эркак чақалоқнинг нафас йўлларини тўсаётгани, унинг бошини кучли равишда чайқаётгани, осмонга отиб ерга йиқитаётгани акс этган видео тарқалган эди. Видеодаги шахс чақалоқнинг лат еган жойларини ҳам намойиш этган.
Болалар омбудсмани расмий телеграм каналида маълум қилинишича, болани қийноққа солган шахс Жиззах шаҳрида яшовчи А.Б., бўлиб, у боланинг отасидир.
Мазкур ҳолат юзасидан боланинг онаси ИИБга мурожаат қилган ва 20 декабрда Жиноят кодексининг 110-моддаси (Қийнаш), 112-моддаси (Ўлдириш ёки зўрлик ишлатиш билан қўрқитиш) ва бошқа моддалар билан жиноят иши қўзғатилган.
Бундан аввалроқ Бош прокуратура Наманган вилояти Мингбулоқ туманида 5 ёшли ўғлини ўлдирмоқчи бўлган эркак қўлга олингани ва унга нисбатан 27 декабрь куни Жиноят кодексининг 25-моддаси (жиноятга тайёргарлик кўриш ва жиноят содир этишга суиқасд қилиш) 97-моддаси 1-қисми (қасддан одам ўлдириш) билан жиноят иши қўзғатилгани тўғрисида маълум қилган.
Расман билдирилишича, 34 ёшли эркак отасининг уйига аразлаб кетиб қолган хотини қайтмагани учун қасд олиш мақсадида ошхона пичоғи билан ўзи билан бирга яшаётган 2018 йилда туғилган ўғлининг бўйнига уч марта пичоқ тортган.
Бақир-чақирларни эшитиб хонага кирган эркакнинг акаси укасининг қўлидан пичоқни тортиб олиб, боланинг ҳаётини сақлаб қолган.