Ўзбекистонда чегара режимини бузган чет эл фуқаролари ва фуқаролиги бўлмаган шахслар бундан буён мазкур ҳуқуқбузарликни содир этганлик учун қўлланилган жаримани тўламаган тақдирдагина мамлакат ҳудудидан маъмурий тарзд чиқариб юборилади. Мазкур тартиб президент Ш. Мирзиёев томонидан шу йил 15 февралида имзоланган Маъмурий жавобгарлик тўғрисидаги кодексга ўзгартиш ва қўшимчалар киритиш тўғрисидаги қонун билан жорий этилмоқда.
Аввалги таҳрирда чегара тартибини бузган хорижликларни, жарима тўлаган-тўламаганига қарамай, мамлакатдан чиқариб юбориш кўзда тутилган эди.
Кодексга киритилган ўзгартиш ва қўшимчалар билан Ўзбекистон ҳудудидан маъмурий тарзда чиқариб юборилган чет элликларнинг кейинчалик мамлакатга кириш ҳуқуқи чекланиш муддати ҳам белгилаб берилган. Хусусан, ҳужжатда давлат чегараси режими биринчи марта бузиб ўтилганда хорижликларнинг 1 йил муддатга, иккинчи марта содир этилганда 3 йил муддатга Ўзбекистонга кириш ҳуқуқи чекланиши қайд этилган.