Қрим татарлари мажлиси раҳбари Рефат Чубаров Россия томонидан аннексия қилинган яриморол аҳлини Украинага қарши урушда иштирок этаётган россиялик ҳарбийлар учун “гуманитар ёрдам” йиғишда иштирок этмасликка чақирди.
“Украина ҳудудига бостириб кирган ҳамда халқаро жиноятчи ва қотил бўлган россиялик ҳарбийларга иссиқ кийимлар ва “гуманитар” ёрдам кўрсатиш бўйича бошқа ҳар қандай акцияда иштирок этманглар. Бу ғайриихтиёрий акцияларда ҳатто бир марталик иштирокингиз ҳам Россиянинг Қримни ишғол қилинишига кўмак кўрсатишингиздан бошқа нарса бўлмаслигини унутманг. Иссиқ кийим ёки бунақа ашёлар бўлмаса, уларни сотиб олиш учун пул беришни таклиф қилаётган кишиларга қатъиян рад жавобини беринг”, деди Чубаров.
Озодликнинг “Idel.Реалии” лойиҳаси хабарига кўра, 7 сентябрь куни Москва томонидан Қримга раҳбар қилиб тайинланган Сергей Аксенов яриморолда ишлаётган Россия муассасалари учун “гуманитар ёрдам” йиғишни кўзда тутган фармойишни имзолаган. Ҳужжатда йиғилган ёрдам россияпараст айирмачи гуруҳлар бўлмиш “ЛХР” ва “ДХР” томонидан назорат қилинаётган Луганск ва Донецк ҳудудидаги “жабрланган аҳоли”га йўлланиши айтилган. Бундан ташқари, Аксеновнинг Қримдаги муассасаларга юборилган хатида “пул маблағлари ўтказилиши кўзда тутилмаган”и ҳамда фақат рўйхатда кўрсатилган ашёларгина қабул қилиниши қайд этилган.
Хатга илова қилинган рўйхатда биринчи ўринда “иссиқ ич кийим” турибди. Ундан кейин эса “чойшаб”, “қишки пайпоқ”, “адёл”, “резина этик”, “қишлик ўрин-кўрпа” ва бошқалар ашёлар, шунингдек, алоҳида банд билан дори-дармонлар саналган.