Эквадор президенти Даниэль Нобоа мамлакатда қуролли конфликт юзага келганини эълон қилди. Отишмаларда ўлганлар сони камида ўн кишига етди. Эквадордаги тартибсизликлар маҳаллий қамоқхонадан криминал авторитетнинг қочгани ортидан бошланиб кетган эди.
Эквадор пойтахти Китонинг тарихий марказига танклар киритилди. Мамлакат Қуролли кучлари бирлашган қўмондонлиги бошлиғи Хайме Вела “фармонда тилга олинган ҳар бир террорчи гуруҳ ҳарбийлар нишони” эканини билдирди.
Президент Нобоа ўз фармонида 21 гуруҳни террорчи деб эълон қилди ва ҳарбийларга уларни жисмонан йўқ қилиш топшириғини берди. Парламент ҳарбийлар ва полициячиларга “хизмат ваколатлари доирасидан ташқари ҳаракат қилгани учун” амнистия берилишини маълум қилди.
Хабарларда айтилишича, ҳалок бўлганларнинг деярли барчаси Гуаякил шаҳридаги тартибсизликлар қурбонидир. Улардан икки нафари полиция ходими. Тартибсизликларда иштирокчиларидан 18 нафари қамоққа олинди.
9 январда ниқоб кийган ва қуролланган номаълум шахслар Гуаякил шаҳридаги TC Televisión телеканали офисига жонли эфир пайтида бостириб кирган ва бир неча журналистни гаровга олган эди. Ҳужумчилар ўзлари билан бомба олиб келгани ҳақида билдирган. Бу қоқеа 15 дақиқа давомида жонли эфирда намойиш этилган. Жонли эфир ўқ овозлари эшитилганидан сўнг узилиб қолган.
Кейинроқ телеканал биносини махсус хизмат ходимлари қуршаб олган. Ҳужумчилар қўлга олинган.
Қуролланган шахслар қўлга олингунига қадар шаҳардаги полиция бўлимига, мактаб ва университетга ҳужум қилган. Қуролли гуруҳ аъзолари полициячилар ва қамоқхона ходимларидан қандай “ўч олганликлари” тўғрисидаги видеоларни эълон қилган.
Бу воқелар президент Наоба қамоқхонадан Фито лақаби билан танилган Los Choneros гуруҳи лидери Адольфо Масияс Вильямар қочиб кетгани ортидан жорий этган комендантлик соати пайтида содир этилди.
Эквадор президенти мамлакатда “қуролли конфликт” режимини жорий этди
"Қуролли конфликт" режими қамоқдан йирик жиноий авторитет қочгани ортидан жорий этилди.