Президент Шавкат Мирзиёев “Ўзбекгидроэнерго” ширкатига қарашли ГЭСларида ишлаб чиқарилаётган электр энергияси учун 2022 йилдан амалда бўлган тарифларни қайта кўриб чиқишни топширди.
Бу ҳақда хабар берган “Газета.uz” бу борада президентнинг 12 октябрдаги саноат ва унинг базавий тармоқларини жадал ривожлантириш бўйича қўшимча чора-тадбирлар тўғрисидаги фармонида қайд этилгани ва бу фармон нусхаси нашр ихтиёрида мавжуд эканини ёзди.
Мазкур фармон билан ГЭСларда ишлаб чиқарилган электр энергияси учун 2022 йил 1 январидан бошлаб белгиланган тарифлар бекор қилинган. Нашрнинг ёзишича, ўшанда президент қарори билан II гуруҳ истеъмолчилари учун мўлжалланган тариф 1 кВт/соат учун 450 сўм, сув оқимларида ишлайдиган ГЭСлар учун — тарифнинг 70 фоизи (кВт/соат учун 315 сўм), электр энергетика тизимининг режимига қараб диспетчер томонидан тартибга солинадиган ГЭСлар учун — тарифнинг 100 фоизи (кВт/соат учун 450 сўм), гидроаккумуляция электростанциялари (ГАЭС) учун — тарифнинг 150 фоизи (кВт/соат учун 675 сўм) қилиб белгиланган эди.
“Шавкат Мирзиёев бош вазир ўринбосари Жамшид Қўчқоров бошчилигидаги Вазирлар Маҳкамаси ҳузуридаги Идоралараро тариф комиссиясига бир ҳафта муддатда «Ўзбекгидроэнерго» таркибидаги ГЭСларда ишлаб чиқариладиган электр энергияси учун тарифларни ушбу компания инвестицион дастурларини молиялаштириш учун етарли ҳажмда тасдиқлашни топширди”, дейилади хабарда.