Туркия президенти Ражаб Тоййиб Эрдўғон ўз мамлакатида ишлаб чиқарилган Togg электромобили ўзбекистонлик ҳамкасби Шавкат Мирзиёевга ҳам жўнатилишини маълум қилди. Бу ҳақда Эрдўғон, Онадўли агентлиги хабарига кўра, 3 апрель куни Анқарадаги президент саройида ўзи буюртма қилган илк электромобилларни қабул қилиб олиш чоғида билдирган.
Душанба кунги маросимда туркиялик автомобилсозлар мамлакат президентига кўк рангдаги, биринчи хоним Эмине Эрдўғонга эса қизил рангдаги Togg T10X автомобилларини тақдим этишган.
Рафиқаси билан биргаликда маҳаллий электромобилни синовдан ўтказган Эрдўғон буни Туркияда “60 йиллик орзунинг амалга ошиши” деб атаган. Журналистлар билан суҳбат чоғида Туркия президенти иккинчи буюртма Озарбайжон президенти Илҳом Алиевга кетишини урғулаб, кейинги машина эса Ўзбекистон президентига йўлланишини қўшимча қилган.
Ўтган йил кузидан буён серияли ишлаб чиқаришга қўйилган ва ҳали сотувга чиқмаган Togg электромобилларига бошланғич даврда 177 минг киши буюртма бергани айтилмоқда. Аввалроқ машиналарнинг дастлабки баҳоси 953 минг лирадан 1 млн 215 минг лирагача (тақрибан 50-65 минг доллар орасида) бўлиши очиқланган.