Ўзбекистон президенти Шавкат Мирзиёев 12 апрель куни туркиялик ҳамкасби Ражаб Тоййиб Эрдўғон томонидан йўлланган Togg электромобилини қабул қилиб олди. Бу ҳақда президент матбуот хизмати маълумот тарқатди.
Мирзиёевга бу ҳадяни айни пайтда Тошкентда бўлиб турган Туркия саноат ва технологиялар вазири Мустафо Варанк бошчилигидаги делегация тақдим этган. Варанкдан электромобиль калитини қабул қилиб олган Мирзиёев ўзи рулга ўтириб, Togg’ни ҳайдаб кўрган.
Президент Эрдўғон Туркияда ишлаб чиқарила бошлаган Togg электромобилидан ўзбекистонлик ҳамкасби Шавкат Мирзиёевга ҳам жўнатилишини маълум қилгани ҳақида Озодлик аввалроқ хабар қилган эди. Бу каби электромобилларнинг яна бири олдинроқ Озарбайжон президенти Илҳом Алиевга тақдим этилган.
Шавкат Мирзиёевнинг турк делегацияси билан чоршанба куни бўлиб ўтган учрашувида, президент матбуот хизмати қайдича, икки мамлакат ўртасидаги амалий ҳамкорликни кенгайтириш, кооперация лойиҳаларини қўллаб-қувватлаш ва илгари суриш, инновациялар ва илғор технологияларни жорий қилиш масалалари ҳамда Ўзбекистон-Туркия кенг кўламли стратегик шериклик муносабатларини мустаҳкамлашнинг бошқа жиҳатлари ҳақида сўз борган.