Эронда 5 июль куни бўлиб ўтган президент сайловининг иккинчи босқичида ислоҳотчи Масъуд Пезешкиан ғолиб бўлди. Бу ҳақда Давлатга қарашли IRNA агентлиги хабар қилди.
Пезешкиан қарийб 16,4 миллион овоз, унинг рақиби – кескин сиёсат тарафдори бўлган Саид Жалилий эса 13,5 миллиондан зиёд овоз йиғолган. Сайловнинг биринчи босқичида Пезешкиан рақибидан тақрибан миллион овоз кўпроқ олиб, устунликка эришган, бироқ у жамғарган овозлар 50 фоизга етмагани учун сайлов иккинчи босқичга қолган эди. Эронда аёллар ва радикал мухолифатчиларнинг президент сайловида номзод ўлароқ иштирок этиши имконсиз.
Эрон ислом республикаси тарихида президент сайловининг иккинчи босқичи фақат бир марта – 2005 йилда ўтказилган.
Бу гал 61 миллиондан зиёд эронлик президент сайловида овоз бериш ҳуқуқига эга эди. Жума куни сайлов участкаларига овоз бериш ҳуқуқига эга бўлганларнинг ярмигина келган.
Mehr агентлиги қайдича, овоз бериш мамлакат Конституциясида кўзда тутилган 10 соатлик муддатдан 6 соат кўпроқ давом этган.
Мухолифат сайловни цирк деб атаб, уни бойкот қилишга чақирган. Сўнгги ҳафталарда эронликлар ижтимоий тармоқларда #ElectionCircus хэштегидан кенг кўламда фойдаланишган.
Эронда навбатдан ташқари сайлов президент Иброҳим Раисийнинг 2024 йил майида авиаҳалокат қурбонига айлангани ортидан белгиланган эди. Эронда президент анча чекланган ваколатларга эга бўлган ҳукумат раҳбари бўлиб ҳисобланади, шунга қарамай, у ғарб мамлакатлари билан алоқалар оҳангига ўз таъсирини кўрсатиш имконига эга.