Парламент Қонунчилик палатаси собиқ депутати, табиат ресурслари вазири маслаҳатчиси Расул Кушербаев Mahalla телеканалидаги “Минбар” кўрсатуви расмийлар танқиди ортидан ёпилиши мумкинлиги ҳақида ёзиб чиқди.
Бюджет тақсимоти бўйича танқидий фикрлар айтилган мазкур кўрсатувда таниқли блогер ва ЎзА директорининг ўринбосари Хушнудбек Худойбердиев ҳам иштирок этган. Худойбердиев кўрсатув давомида ўзбекистонликлардан “парламент ва маҳаллий кенгашларга бўладиган келгуси сайловларда фаол бўлишни, ўша округдаги аҳолининг манфаатлари учун ўлиб-тириладиган, бюджет тақсимотида керак бўлса ҳокимнинг ёқасидан олиб талашадиган депутатларни сайлаш кераклигини сўраганини қайд этган.
“Чунки салкам бутун халқни оёққа турғазган Ташаббусли бюджет лойиҳасида ижтимоий масалаларни ҳал қилишга йўналтирилган бюджетнинг атиги 8%и ажратилган, холос. Қолган 92% маблағни қаерга сарфлашни яна ҳокимлар ва амалдорларнинг ўзи ҳал қилмоқда. Шу сабабли бизга халқ манфаатларини ҳимоя қиладиган “уйғоқ” депутатлар керак”, деб ёзган Худойбердиев Кушербаевнинг сўзларига таянган ҳолда “Минбар” ток-шоуси ёпилаётганини, кейинги кўрсатувни тасвирга олиш ишлари тўхтатилганини урғулаган.
“Калласи катта цензурачи акаларимиз нимани гапириш мумкин ёки мумкинмаслигининг рўйхатини ҳам бериб қўйишмабди-да, шунда бизнинг касримизга битта яхши кўрсатув ёпилиб кетмаган бўлармиди…”, дея таассуф билдирган блогер.
“Минбар” ток-шоусида мунозарага сабаб бўлган “Ташаббусли бюджет” кампаниясининг 1-мавсуми бўйича овоз бериш жараёни апрель ойи бошида ниҳоясига етгани ҳақида Озодлик аввалроқ хабар қилган. "Очиқ бюджет" портали ҳисоб-китобича, ўша пайтда 33 минг 680 та лойиҳага жами 16 миллиондан зиёд овоз берилган, 1666та лойиҳа ғолиб деб топилган. Бу лойиҳаларга давлат бюджетидан жами 1,57 триллион сўмга яқин пул сарфланиши айтилган.
“Ташаббусли бюджет” кампанияси чоғида юзага келган қатор муаммолар жамоатчилик фаоллари томонидан танқид қилинган ва бунга оид баҳслар ҳанузгача тинган эмас.