Финляндияда бўлиб ўтган президент сайловининг иккинчи босқичида собиқ бош вазир ва “Миллий коалиция” партияси аъзоси Александр Стубб ғалаба қозонди. Бу ҳақда Финляндиянинг Yle нашри хабар қилди.
Сайловнинг дастлабки натижаларига кўра, Александр Стубб 51,6 фоиз, унинг рақиби - собиқ ташқи ишлар вазири Пекка Хаависто эса 48,4 фоиз овоз олишга муваффақ бўлган.
55 ёшли Александр Стубб аввал молия вазири, ташқи ишлар вазири, бош вазир лавозимларини эгаллаган, Финляндия парламенти ва Европарламент депутати бўлган, ЕХҲТга раислик қилган. У 2017 йилдан буён Европа инвестиция банкининг вице-президенти лавозимида ишлаб келаётган эди.
Январь ойи ўрталарида Стубб Reuters агентлигига берган интервьюсида Украинани ҳеч бир шартсиз қўллаб-қувватлашни ваъда бериб, Москва Киевга қарши урушни бас қилмагунича Россия президенти Владимир Путин билан алоқалар яхшиланиши эҳтимолини назардан соқит қилган эди.
Финляндияда президент олти йилга сайланади, бу лавозимга бир кишининг кетма-кетига икки мартадан кўп сайланиши мумкин эмас. Айни пайтда бу мамлакатда президентлик курсисини Саули Ниинистё эгаллаб турибди. У 2012 йилдан буён икки марта президент этиб сайлангани учун бу галги сайловда иштирок этган эмас.
2022 йили Финляндия Россия қўшинлари Украинага бостириб киргани ортидан нейтралитетдан бош тортиб, НАТОга киришга қарор қилган. Ўтган йилнинг апрелидан Финляндия расман НАТОнинг тўлақонли аъзоси бўлиб ҳисобланади.