Франция Сенати 11 март куни пенсия ёшини 62 дан 64 га кўтариш назарда тутилган пенсиявий ислоҳотни маъқуллади. Мазкур лойиҳага қарши Франциянинг барча ҳудудларида норозилик намойишлари ўтказилган эди.
Пенсия ислоҳоти учун 195 сенатор овоз берди, 112 сенатор қарши чиқди. Кейинги ҳафтада қонунни парламентнинг қуйи ва юқори палатаси қўшма қўмитаси муҳокама қилиши кутилмоқда. Reuters агентлигининг билдиришича, муҳокама чоршанба куни ўтказилиши режалаштирилган. Шундан сўнг қонун лойиҳасининг якуний матнини тасдиқлаш жараёни бошланади.
Францияда бир ҳафтадан бери пенсия ёшининг ўзгартирилишига қарши намойишлар бўлиб ўтмоқда. Париждаги намойишларда камида 48 минг, ҳудудларда эса камида 368 минг киши норозилик билдираётгани хабар қилинди.
11 март куни Парижда норозилар полиция билан тўқнашди. Тартибсизликлар пайтида дўконларнинг ойналари синдирилди ва чиқинди қутилари ёқиб юборилди. 32 киши қўлга олинди. Чоршанба куни Францияда умуммиллий иш ташлаш ўтказилади.
Франция касаба уюшмалари вакиллари ўтган ҳафтада президент Эммануэл макрон билан икки марта учрашишга ҳаракат қилди. Бироқ президент уларни қабул қилишдан бош тортди. Бу эса халқ орасидаги норозиликни янада кучайтирди.
Франция Сенати норозилик намойишларига қарамай пенсия ислоҳотини маъқуллади
Париждаги намойишларда камида 48 минг киши иштирок этаётгани хабар қилинди.