Францияда 27 июнь куни полициячининг 17 яшар йигитчани отиб ўлдириши ортидан юзага келган тартибсизлик ҳалигача тингани йўқ. Пайшанбага ўтар кечаси пойтахт Париж ва атрофида кузатилган тартибсизликлар чоғида, ички ишлар вазири Жеральд Дарманеннинг маълум қилишича, камида 150 киши қўлга олинган.
Маълумотларга кўра, тартибсизлик иштирокчилари ўнлаб автомобилни ёқиб юборишган, кўчаларни тўсиб қўйишган, дўконларни талашган, полициячиларга тош ва бошқа ашёлар улоқтиришган, бунга жавобан полиция кўздан ёш сиздирувчи газ қўллаган.
Номаълум шахслар Парижнинг жануб томонидан жойлашган Френ шаҳридаги қамоқхона дарвозаси олдида қўриқчилар постига мушаклар билан ҳужум қилишган. Францияда катталиги жиҳатдан иккинчи ўринда турадиган бу қамоқхонага, Le Monde нашрининг полициядаги манбасига кўра, ҳужумчилар бостириб киришига йўл қўйилмаган.
Лилль, Тулуза ва Лион шаҳарларида ҳам намойишчиларнинг полиция билан тўқнашуви кузатилган.
Намойишлар бошланишига Париж яқинидаги Нантер шаҳрида сешанба куни рўй берган фожиа сабаб бўлган. Полиция маълумотига кўра, автомобиль бошқараётган Наэль М. исмли ўспирин полициянинг талабига бўйсунмаган ва бунинг ортидан отиб ўлдирилган. Бироқ ижтимоий тармоқларда тарқалган воқеа видеосида автомобилни текшириш чоғида полициячи ҳайдовчини нишонга олиб тургани акс этган. Автомобиль жойидан ҳаракатланган пайтида полициячи ўқ отган ва ўқ ҳайдовчининг кўксига теккан. Воқеа жойига етиб келган врачлар 17 яшар ўспиринни қутқариб қола олишмаган. Rfi хабарига кўра, ҳайдовчини отган 38 ёшли полициячи қасддан одам ўлдирганликда гумонланиб, ҳибсга олинган. Нашрга кўра, ҳолат юзасидан иккита текширув бошлатилган.
Франция президенти Эммануэль Макрон мазкур ҳодиса ўзига қаттиқ таъсир қилганини айтиб, зўравонликни тўхтатиш ва “адолат қарор топиши учун” тинчланишга чақирган. У полициячи томонидан ўспириннинг ўлдирилишига оид тергов энг қисқа муддат ичида якунига етказилиши ҳам талаб қилган.