Миллий антидопинг агентлиги матбуот хизматининг 17 февралда билдиришича, грек-рим курашчиси Султонбек Элмуратовдан 2021 йил октябрь ойида мусобақадан ташқари даврда олинган допинг синамасидан тақиқланган Фуросемид моддаси топилган.
Ахлоқ комиссияси қарорига асосан Султонбек Элмуратов 2021 йил 23 декабридан 2025 йилнинг 22 декабригача дисквалификация қилинди.
Элмуратов допинг ортидан дисквалификация қилинган ўзбекистонлик ягона спортчи эмас. Ўтган йилнинг майида боксчи Бектемир Мелиқўзиев допинг истеъмол қилгани аниқлангани ортидан тўрт йил муддатга дисквалификация қилинди. Унинг 2020 йил 16 февралдан бошлаб мусобақаларда олган барча медаллари ва рейтинг очколари бекор қилинди.
2021 йилнинг апрелида Миллий антидопинг агентлиги ҳузуридаги аҳлоқ комиссияси оғир атлетика бўйича миллий терма жамоа аъзоларидан 7 нафарини допинг истеъмоли ортидан спортдан четлатган.
2018 йил декабрида оғир атлетика бўйича Ўзбекистон тарихидаги илк жаҳон чемпиони, “Ўзбекистон ифтихори” Руслан Нуриддинов допинг истеъмол қилганликда айбланиб, вақтинча спортдан четлатилди.
Бундан аввалроқ 2008 ва 2012 йилги Олимпия ўйинларидаги допинг намуналарини қайта текширувдан ўтказган Халқаро олимпия қўмитаси Артур Таймазовни Бейжинда эркин курашдан қўлга киритган олтин, Сослан Тигиевни кумуш медалдан маҳрум этган эди.