“Хорижий агентлар”га оид қонунга қарши Тбилисида бўлиб ўтган митингда 66 киши тутиб кетилган, уларга майда безорилик ва полицияга қаршилик кўрсатганлик моддалари бўйича айбловлар қўйилади. Бу ҳақда Грузия Ички ишлар вазирлиги маълумот тарқатди.
Вазирлик қайдича, кечаги митинг бўйича полициячиларга ҳужум ҳамда мол-мулкка зарар етказиш ёки йўқ қилиш тўғрисидаги моддалар асосида очилган иш юзасидан тергов бошлаган. ИИВ акция иштирокчилари полициячиларга тош, тез алангаланадиган воситалар, тўмтоқ жисмлар улоқтиришган ва уларга нисбатан жисмоний куч ишлатишганини, шунингдек, вазирлик автомобилларини ёқишиб, парламент биносига шикаст етказишгани иддао қилган.
Ўз навбатида, полициячилар митингчиларга қарши кўздан ёш сиздирувчи газ, шовқинли гранаталар ва сувотарлардан фойдаланишган. Воқеа жойида тиббиёт ходимлари иш олиб боришган: улар ниқоб ва ичимлик суви тарқатишган, жабрланганларга илк тиббий ёрдамни кўрсатишган.
ИИВ ҳисоб-китобига кўра, норозилик акцияси чоғида 50 чоғли полициячи жабр кўрган. Жароҳатланган намойишчилар сонига аниқлик киритилган эмас.
Сешанба куни Грузия парламенти биринчи ўқишда хорижий агентлар тўғрисидаги қонунни қабул қилгани ортидан минглаб киши бунга қарши норозилик митингига чиққани ва парламент биносига бостириб киришга урингани ҳақида Озодлик аввалроқ хабар қилган. Бир неча юз кишилик акция Батуми шаҳрида ҳам бўлиб ўтган.
Грузия президенти Саломе Зурабишвили фуқароларга мурожаатида парламент биноси олдида турган норозиларни қўллашини билдириб, “хорижий агентлар” тўғрисидаги қонунга вето қўйишини урғулаган.