Ўзбекистонда 2024 йил 1 июлдан бошлаб тўлов тизими операторлари ва тўлов ташкилотлари фақат акциядорлик жамияти шаклида фаолият юритади. Бу борадаги қарорни президент Шавкат Мирзиёев 30 ноябрда имзолади.
Қарорга асосан 2024 йил 1 июлдан тўлов тизимлари операторлари учун устав капиталининг энг кам миқдори 50 миллиард сўм, тўлов ташкилотлари учун 10 миллиард сўм қилиб белгиланади. 2025 йилнинг 1 июлидан эса тўлов ташкилотлари устав капитали 20 миллиард сўмдан кам бўлмаслиги шарт.
Қарорда Humo тўлов тизимидаги давлат улуши тўлиқ Давлат активларини бошқариш агентлигига ўтказилиши қайд этилган. Шу кунгача Humo Марказий банкнинг Бош ахборотлаштириш марказига тегишли эди.
Бундан ташқари Марказий банк бошқа банклардан шубҳали операциялар амалга оширилган банк карталари ва ҳисоб рақамларини блоклаб қўйишни талаб қилиш ҳуқуқига эга бўлади.
Қарорда таъкидланишича, сўнгги пайтларда банк карталаридан пул ўғирланиши ҳолатлари кўпайгани ортидан Марказий банкка мана шундай ҳуқуқ берилмоқда.
Марказий банк талаби билан карталар ва ҳисоб рақамлари уч кунгача блокланиши шарт бўлади.