Tesla ва SpaceX ширкатлари асосчиси Илон Маск яна дунёнинг энг бой одамлари рўйхатининг биринчи поғонасига кўтарилди, деб хабар берди Bloomberg. Нашрнинг билдиришича, ҳозир унинг бойлиги 187 миллиард долларга баҳоланмоқда.
2022 йилнинг декабрида Илон Маск биринчиликни Louis Vuitton Moët Hennessy раҳбари Бернар Арнога бой берган эди. Ҳозир 185 миллиард долларга эга бўлган Арно энг бой одамлар рўйхатининг иккинчи поғонасига тушиб қолди.
2022 йил декабрида Bloomberg Илон Маск дунёда 200 миллиард долларини йўқотган илк миллиардер бўлганини ҳам ёзган эди. Маск 200 миллиард долларини йўқотгунича 340 миллиард доллардан кўпроқ бойликка эга эди. Маскнинг бунча пулни йўқотишига Tesla акцияларининг қадрсизланиши сабаб бўлганди.
2023 йилда Tesla акциялари яна ўса бошлади ва икки ой ичида 70 фоизга қимматлади. Бунинг оқибатида Маскнинг бойлиги 50 миллиард долларга кўпайди.
Айни пайтда Forbes Илон Маск жаҳондаги энг бой одамлар рўйхатида ҳанузгача француз Бернар Арнодан кейин иккинчи поғонада турганини ёзмоқда. Bloomberg ҳам, Forbes ҳам жаҳоннинг энг бой одамлари рўйхатининг учинчи поғонасида Amazon асочиси Жефф Безосни қайд этган.
Bloomberg: Илон Маск яна дунёнинг энг бой одамига айланди
2022 йил декабрида Илон Маск дунёда 200 миллиард долларини йўқотган илк миллиардер бўлган эди.