Самарқанд вилоят Пастдарғом туманидаги “Агрокимё таъминот сервис” МЧЖга қарашли контейнерда жасади топилган икки ишчи ис газидан заҳарланиб ўлгани аниқланди. Бу борада Бош прокуратура матбуот котиби Ҳаёт Шамсутдинов 24 ноябрь куни маълум қилди.
Унга кўра, ишчиларнинг ўлим сабабларини аниқлаш юзасидан суд тиббий экспертизаси тайинланган. Экспертиза хулосасида қайд этилишича, ишчилар яшаш учун мослаштирилган контейнерда қўлбола усулда ясалган печкадан чиққан ис газидан заҳарланиб вафот этишган.
Аввалроқ 17 ноябрь куни тумандаги “Балхиён” маҳалла фуқаролар йиғини ҳудудидаги “Агрокимё таъминот сервис” МЧЖга киришда ўрнатилган металл контейнердан номаълум моддадан заҳарланиб ўлган икки нафар ишчининг жасади топилгани хабар қилинган эди.
Бандлик ва меҳнат муносабатлари вазирлигининг билдиришича, Ўзбекистондаги корхона ва ташкилотларда жорий йилнинг 10 ойида 558 та бахтсиз ҳодиса юз берди.
Мазкур ҳодисалар оқибатида 166 нафар ишчи-ходим ҳалок бўлди, 432 нафари оғир тан жароҳати ва 25 енгил тан жароҳатларини олган.