Ўзбекистон қиличбозлик федерацияси Италияда ўзбекистонлик 17 ёшли қиличбоз қиз зўрлангани тўғрисида тарқалган хабарларга расман раддия билдирди.
Аввалроқ Nemolchi.uz лойиҳаси Radiotelevisione Italianaга таянган ҳолда 2023 йилнинг 5 августига ўтар кечаси қиличбозлик бўйича Италия ўсмирлар терма жамоасининг уч спортчиси ўзбекистонлик қизни зўрлагани тўғрисида маълумот пайдо бўлгани ҳақида билдирган эди.
Италиянинг Il Messaggero газетаси ҳам 3 март куни бу ҳақда ёзган. Хабарда айтилишича, қиз Италия қиличбозлик федерацияси (FIS) томонидан Кьянчано-Терме шаҳрида ташкил этилган ўқув йиғини пайтида зўрланган.
Газетанинг ёзишича, жабрланган қиз терговда йиғин иштирокчилари учун уюштирилган зиёфатда “нимадир ичганини ва шундан сўнг уч йигит билан битта хонада уйғонганини айтган”. Қиз бу хонадонга қандай бориб қолганини эслай олмаган. Қизнинг танасида моматалоқлар бўлган.
Хабарда ҳозирда икки гумонланувчига нисбатан тергов олиб борилаётгани, учинчи йигит иши эса вояга етмаганлар бўйича прокуратура томонидан текширилаётгани айтилади.
Ўзбекистон қиличбозлик федерациясининг 5 март куни эълон қилинган расмий раддиясида ўзбекистонлик спортчи қизнинг Италияда зўрлангани тўғрисидаги хабарлар ҳақиқатга зид келиши билдирилган.
“Айнан 2023 йилнинг 4-5 август кунлари қиличбозлиқ бўйича миллий терма жамоамиз аъзолари ҳар учала тур бўйича Италиядаги халқаро ўқув машғулот йиғинларига қатнашмаган, балки Хитойда бўлиб ўтган Бутунжаҳон Уневерсиада ўйинларида иштирок этган эди”, дейилади раддияда.
Расман билдирилишича, Қиличбозлик федерацияси раҳбарияти ушбу маълумот юзасидан йиғилиш ўтказди ва бу хабарни “кучли спортчиларга бевосита қаратилган спорт ва сиёсий ўйинларнинг энг кенг тарқалган усулларидан бири” сифатида баҳолади.
Ўзбекистон қиличбозлик федерацияси спортчи қизнинг Италияда зўрланганини рад этди
Иллюстратив сурат.