Жанубий Африка Республикаси парламенти биносида 2 январь куни катта ёнғин содир бўлди. Пойтахт Кейптаундан олинган кадрда бино томини қоплаб олган аланга ва қора тутун осмонга ўрлаётганини кўриш мумкин.
Ёнғинга қарши кураш учун ўнлаб ўт ўчирувчилари жалб қилинган. Ёнғин чиқиши сабаблари ҳозирча маълум эмас. Ҳодиса чоғида жабрланганлар ҳақида ҳам ҳали маълумот йўқ.
Би-би-си қайдича, ёнғин апартеид режимига қарши курашчи архиепископ Десмонд Тутунинг дафн маросимидан бир неча соат ўтиб бошланган. Мазкур маросим парламент биноси яқинида бўлиб ўтган.
France-Press агентлиги хабарига кўра, ёнғин туфайли бино деворларида ёриқлар пайдо бўлган.
Кейптаундаги парламент биноси учта қисмдан иборат бўлиб, уларнинг энг эскиси 1884 йилда қурилган. Қолган икки қисм эса ўтган асрнинг 20- ва 80-йилларида барпо этилган.