АҚШ президенти Жо Байден чоршанбага ўтар кечаси Россия ва Украина теварагидаги вазият бўйича янги баёнот берди.
Россия президенти Владимир Путин томонидан Донбассдаги бўлгинчи республикалар мустақиллигининг тан олиниши ва улар ҳудудига Россия қўшинлари киритилишини Оқ уй “Россиянинг қўшни мамлакатга тажовузи ибтидоси” деб атаган.
Жо Байден Путин Россияси Украинанинг янада кўпроқ ҳудудларини босиб олишга уринишини айтиб, шу муносабат билан Москвага нисбатан кескинроқ ва кенгроқ кўламда санкциялар жорий этишни таклиф қилган.
Оқ уй раҳбарига кўра, АҚШ Россия элитаси вакиллари ва уларнинг оила аъзолари, шунингдек икки банк – ВЭБ ҳамда “Промсвязбанк”ка қарши санкциялар киритади. Чекловлар Россиянинг суверен қарзига нисбатан ҳам татбиқ этилади.
Байденнинг чиқишидан сўнг АҚШ Молия вазирлиги санкция остига тушган Россия юридик ва жисмоний шахслари рўйхатини эълон қилган. Унда Россиянинг уч юқори мартабали мулозимининг ўғиллари исми бор, булар: Денис Бортников (ФСБ директорининг ўғли), Пётр Фрадков (ТРХ собиқ директорининг ўғли) ҳамда Владимир Кириенко (президент администрацияси бошлиғи биринчи ўринбосарининг ўғли). Ўғилларнинг ўзлари ҳам муҳим лавозимларда ишлайди: Денис Бортников ВТБ банки вице-президенти, Пётр Фрадков “Промсвязбанк”ка, кичик Кириенко эса VK гуруҳига раҳбарлик қилади. Рўйхатда банкларнинг 40 дан ортиқ шуъбалари ҳам қайд этилган.
“Россия тажовуз кўламини кенгайтирадиган бўлса, биз ҳам санкцияларни кучайтирамиз. Қўшни мамлакатга тегишли ҳудуддаги бўлгинчи тузилмаларни мустақил давлат деб тан олишга Путиннинг нима ҳаққи бор?” дея урғулаган Байден.
Оқ уй раҳбари АҚШ Украина ва НАТОни дастаклашда, иттифоқчилари билан бирликда ҳаракат қилишда давом этишини билдирган. Шунингдек, Байденга кўра, Россия Беларусь ҳудудидаги кучларини олиб чиқиб кетмагунча Қўшма Штатлар Болтиқ мамлакатларига қўшимча аскар ва ҳарбий техника йўллайди.