Жорий йил бошидан то шу кунгача Ўзбекистонда 26 та ноқонуний майнинг ферма аниқланди ва уларнинг фаолияти тўхтатилди, деб хабар берди Бош прокуратура.
Мазкур фермалар томонидан 29 миллион кВт-соат электр энергияси ишлатилган. Бу 145 минг хўжаликнинг бир ойлик истеъмолига тенгдир. Бош прокуратураниниг билдиришича, бунинг оқибатида давлатга 58 миллиард 200 миллион сўмлик зарар етказилган.
Майнинг фермалар ташкил қилган 29 кишига нисбатан Жиноят кодексининг 169-моддаси (ўғрилик) асосида жиноят иши очилган. Улар 8 йилдан 15 йилгача қамалиши мумкин.
Ўзбекистонда майнинг фермалари фаолиятига рухсат берилгани тўғрисида Адлия вазирлиги 4 октябрь куни маълум қилганди. Расман билдирилишича, бу борада ҳукумат 29 сентябрда “Майнинг фаолиятини амалга ошириш учун рухсатнома бериш тартиби тўғрисида”ги низомни тасдиқлаган.
Низомга асосан, майнинг фақат юридик шахс томонидан қуёш фотоэлектр станциялари орқали ишлаб чиқарилган электр энергиясидан фойдаланган ҳолда амалга оширилади. Қонунчилик ҳужжатларида назарда тутилган ҳолларда майнерлар истеъмол қилинган электр энергиясини ҳисобга олиш ускунасини ўрнатиб, ягона электр энергетика тизимига уланиши мумкин.
Ўзбекистонда 26 та ноқонуний майнинг ферма аниқланди
Иллюстратив сурат. Майнинг фермаси.