Халқаро футбол федерацияси (FIFA) Американинг "Интер Майами" клуби ҳужумчиси ва футбол бўйича Аргентина терма жамоаси ўйинчиси Лионель Мессини 2023 йилнинг энг яхши футболчиси сифатида тан олди. Бу ҳақда Лондонда ўтган FIFA Football Awards тадбирида эълон қилинди.
Месси учинчи марта дунёнинг энг зўр футболчиси сифатида тан олинмоқда. Унинг ўзи тадбирда иштирок этмади. Унинг ўрнига мукофотни франциялик футболчи Тьери Анри қабул қилиб олди.
Месси бу соврин учун Норвегия терма жамоаси ва Британиянинг "Манчестер Сити" футболчиси Эрлинг Холанд ва Франция терма жамоаси ва "Пари Сен-Жермен" ўйинчиси Килиан Мбаппе билан рақобатлашди.
Мессининг энг яхши футболчи сифатида эътироф этилиши кўпчилик кузатувчилар учун кутилмаган ҳолат бўлди. Чунки кузатувчилар Месси билан тенг овоз олган Холанд соврин эгаси бўлишини башорат қилаётган эди. Мессига миллий терма жамоаларнинг кўпчилик капитанлари овоз бергани ортидан у ғолиб деб топилган.
2023 йил октябрида Месси саккизинчи марта “Олтин тўп” соҳиби бўлган эди. Месси саккиз марта “Олтин тўп” олган ягона футболчидир. Бу мукофотни ҳар йили France Football журнали топширади.