Россия президенти Владимир Путин Россия Давлат кенгаши таркибига ўзгартишлар киритиш тўғрисидаги фармонни имзолади. Ҳужжатда Рустам Минниханов “Татаристон раҳбари” ўлароқ қайд этилган.
Фармонда жумладан шундай дейилган: “Р.Н.Миннихановнинг лавозими қуйидаги таҳрирда баён қилинсин: “Татаристон Республикаси раҳбари”.
Фармон 12 июль куни ҳуқуқий маълумотлар порталида эълон қилинган.
Сентябрь охирида ҳудудлар бошлиқларини “раҳбар” деб аташ назарда тутилган “Россия Федерацияси субъектларида оммавий ҳокимиятни ташкил қилиш принциплари тўғрисида”ги қонун лойиҳаси Давлат Думасига киритилган эди.
Озодликнинг татар-бошқирд хизмати хабарига кўра, Татаристон Давлат кенгаши лойиҳани маъқулламаган. Россия президентининг матбуот котиби Дмитрий Песков Кремль Татаристон Давлат кенгашининг ҳудуд президенти лавозимини қайта номлаш бўйича позициясини ҳурмат қилишини, аммо бу фикрлардан бири холослигини айтган.
Ноябрь ойи бошида Давлат Думасининг давлат қурилиши ва қонунчилик қўмитаси раиси ва қонун лойиҳаси муаллифларидан бири бўлмиш Павел Крашенинников Татаристоннинг танқидий муносабатига қарамай, ҳудудлар раҳбарларини “президент” деб аташни тақиқловчи қонун лойиҳаси ўзгартирилмаслигини билдирган. У Думага лойиҳа юзасидан 80 дан ортиқ хулоса келгани ва ҳужжат хусусида фақат Татаристон салбий фикр билдирганини урғулаган.
Татаристонда ҳозирча “президент” лавозими сақланиб қолмоқда. Йил бошида ижтимоий тармоқларда Татаристон прокуратурасининг хати пайдо бўлган, унда Россия Федерацияси субъекти раҳбари “президент” деб аталиши мумкин эмаслиги ҳақида айтилган эди. Хатда қайд этилишича, республика қонунчилигини федерал қонунчиликка уйғунлаштириш ишлари ҳали якунланмаган.
Татаристон Давлат кенгаши спикери Фарид Мухаметшин 2018 йилги матбуот анжуманида уларни “президент” номини олиб ташлашга мажбурлашган тақдирда Конституциявий судга мурожаат қилинишини, 2020 йилда эса Конституция ўзгартирилишини, аммо “президент” лавозими қолишини айтган. 2021 йил декабрида у Татаристон Конституциясига ўзгартишлар киритилганидан сўнг республика президенти қандай аталиши ҳақидаги саволга жавоб беришга қийналган.