Ўзбекистонда 2025 йилдан Аи-80 бензинидан тўлалигича воз кечилиши мумкин. Бунга оид топшириқ 29 январь кунги видеоселекторда президент Шавкат Мирзиёев томонидан бош вазир Абдулла Ариповга берилди.
Мазкур видеоселектор йиғилиши, президент матбуот хизмати маълумотига кўра, 2024 йилда уй-жой, қурилиш, коммунал хўжалиги, транспорт ва экология соҳаларида амалга оширилиши лозим бўлган устувор вазифаларга бағишланган.
Экологик жиҳатдан зарарли деб топилган АИ-80 кўплаб мамлакатлар, шу жумладан, Ўзбекистонга қўшни бўлган Қирғизистон ва Тожикистонда тақиқланган. 2017 йилда 80 октанли бензин Қозоғистонда ҳам йўқолган - у фақат махсус буюртма асосида ишлаб чиқарилади, холос.
Аввалроқ Ўзбекистон Экология вазирлиги баёнот тарқатиб, унда жумладан “халқаро стандартларга тўғри келмайдиган АИ-80 маркали бензиндан фойдаланаётган техника воситалари атмосферага меъёридан ортиқ зарарли ташламалар чиқараётгани”ни урғулаган эди.
Вазирлик Тошкент ҳавосига кўрсатилаётган салбий таъсирни камайтириш мақсадида бир қатор фавқулодда чораларни таклиф қилган бўлиб, улар орасида “Евро-4” стандартидан паст экологик тоифадаги мотор ёқилғидан (АИ-80 русумли бензин) фойдаланишни тақиқлаш ҳам бор эди.
Душанба кунги видеоселектор йиғилишида Тошкент шаҳрида оғир юк машиналари, 10 йилдан ошган автомобиллар ҳамда “Евро-4”дан паст ёнилғидан фойдаланишнинг экологияга таъсирини камайтириш бўйича аниқ механизмлар ишлаб чиқилиши қайд этилган.