Вазирлар Маҳкамаси ҳузуридаги Таълим сифатини назорат қилиш давлат инспекцияси томонидан тузилган миллий рейтингда бу йил биринчи ўринни Тошкент ирригация ва қишлоқ хўжалигини механизациялаш муҳандислари институти эгаллади. Бу ҳақда 4 ноябрь куни Тошкентда ўтказилган матбуот анжумани чоғида эълон қилинган.
Рейтингда пешқадам бўлган институтни яқинда иккинчи муддатга президентликка сайланган ва 6 ноябрь куни қасамёдга келтирилиши кутилаётган Шавкат Мирзиёев 1981 йилда тугатиб, меҳнат фаолиятини ҳам шу ОТМда кичик илмий ходимликдан бошлаган ва бу ерда катта ўқитувчи, доцент, ўқув ишлари бўйича проректор лавозимларида ишлаган.
Олий таълим муассасалари рейтингида иккинчи ўринга Ўзбекистон миллий университети қўйилган. Бунгача мазкур ОТМ миллий рейтингда кетма-кет уч йил биринчиликни қўлдан бермай келган.
Рейтингда дастлабки бешталикка яна Тошкент тиббиёт академияси, Самарқанд давлат университети ҳамда Тошкент молия институти каби ОТМлар киритилган.
Сўнгги бешталикдан эса Фарғона жамоат саломатлиги тиббиёт институти, Навоий давлат педагогика институти, Самарқанд давлат архитектура-қурилиш институти, Нукус давлат педагогика институти ва Қўқон давлат педагогика институти кабилар жой олган.