Об-ҳаво шароитининг ноқулайлиги сабабли 7 июль оқшомида “Тошкент” аэропортида ҳаво кемаларининг қўниши ва учишига чекловлар жорий этилган.
Uzbekistan Airports ширкати қайдича, шиддатли ёмғир ва аэродром устида момақалдироқ туфайли якшанба оқшомида бир неча рейс муқобил аэродромларга йўналтирилган.
“Хусусан, бортида 183 йўловчи бўлган Санкт-Петербург – Тошкент йўналиши бўйича учган HY-634 рейси, Мюнхен - Тошкент йўналиши бўйича учган ва бортида 116 йўловчи бўлган HY-236 рейслари Самарқанд аэропортига қўнди”, дейилган хабарномада.
Uzbekistan Airports яна учта юк рейси ҳам муқобил аэродромларга йўналтирилганини қўшимча қилган. Хусусан, HY-3124 “Будапешт – Тошкент” рейси Навоийга, AZG-6941 “Боку – Тошкент” рейси Наманган аэропортига, MFX-656 “Урумчи – Тошкент” рейси Самарқандга қўнган.
“Айни дамда Тошкент аэропортида об-ҳаво шароити барқарорлашди, ўрнатилган чекловлар олинди”, дейилган ширкат томонидан тунга яқин тарқатилган хабарномада.