Ўзбекистонда муддатидан илгари президент сайлови кампанияси шу йилнинг 10 майидан бошланади. Бу ҳақда Марказий сайлов комиссиясининг президент сайловига тайёргарлик кўриш бўйича чоршанба куни ўтказилган мажлисида эълон қилинди.
Мажлисда қайд этилишича, 13 майгача мамлакатдаги сиёсий партияларнинг барчаси ўз вакилларини рўйхатдан ўтказишлари, 15 майгача эса сайловда иштирок этиш учун ҳужжат топшириши лозим бўлади.
Президентликка номзод кўрсатиш ишлари 17 майдан 1 июнгача юритилади, номзодларга оид ҳужжатлар эса 2 июнгача топширилиши керак. Номзодларни рўйхатга олиш иши 6 июнь куни якунланади.
Икки кун муқаддам амалдаги президент Шавкат Мирзиёев шу йилнинг 9 июлида Ўзбекистонда муддатидан илгари президент сайлови ўтказиш тўғрисидаги фармонни имзолагани ҳақида Озодлик аввалроқ хабар қилган.
Жорий йилнинг 30 апрелидаги референдумда президент муддати ҳамда ваколатлари ўзгартирилган янги таҳрирдаги конституция 90 фоиздан ортиқ овоз билан маъқулланганди. Унда президент муддати 5 йилдан 7 йилга узайтирилган.
Кузатувчилар референдум ўтказишдан кўзланган асосий мақсад аввал-бошдан Мирзиёевнинг президентлик муддатини узайтириш эканини тахмин қилишган.
Сайлов ўтказиладиган ойда 66 ёшни қаршилайдиган Шавкат Мирзиёев сўнгги бор 2021 йил октябрида 80 фоиздан кўпроқ овоз билан иккинчи 5 йиллик муддатга президент этиб сайланганди.
Муддатидан илгари президент сайлови Шавкат Мирзиёевга 2037 йилгача ёки 80 ёшгача ҳокимиятда қолиш имконини беради.
Маҳаллий қонунчиликка мувофиқ, президент сайловининг умумий натижалари овоз бериш кунидан бошлаб 10 кундан кўп бўлмаган муддат ичида, яъни 19 июлгача эълон қилиниши лозим.