Африка қитъасида жойлашган Нигер давлатида 26 июль куни Президент гвардияси томонидан ҳарбий тўнтаришни амалга ошириш уриниши амалга оширилди.
Халқаро ахборот агентликлари хабарларига кўра, ҳарбий бўлинмалар пойтахт Ниамейдаги ҳукумат кварталини блокировка қилишган. Улар президент саройи ва айрим вазирликлар биноларига олиб борувчи йўлларни тўсиб қўйишган.
Reuters агентлиги мухбири шаҳарда ҳаёт анча осойишта кечаётгани, интернет узиб қўйилмаганини, йўлларда эса тиқинлар кузатилмаётганини қайд этган.
Президент гвардияси томонидан бошлатилган тўнтаришни мамлакат армияси дастакланган эмас.
Нигер президенти Муҳаммад Базум оиласи билан бирга “соғ-омон” экани айтилмоқда. У ўз баёнотида, агар исёнчилар ўз фикрларидан қайтишмаса, уларга армия ҳужум қилишга тайёрланаётганини айтган.
Тўнтариш уринишига Базумнинг Президент гвардияси раҳбари, генерал Умар Чианини ишдан бўшатиш истаги сабаб бўлгани тахмин қилинмоқда.
Бу Муҳаммад Базум президентлиги давридаги иккинчи тўнтариш уриниши бўлиб ҳисобланади. 2021 йил мартида ҳарбий бўлинмалардан бири президент саройини эгаллаб олишга уринган эди. Бу воқеа Базумнинг инаугурация маросимига бир неча кун қолганида содир бўлган.