Япониянинг Nissan автомобилсозлик ширкати Россия бозоридан кетишга қарор қилди. Ширкатнинг Россиядаги активлари Саноат ва савдо вазирлиги қошидаги корхонага ўтадиган бўлди. Бу ҳақда Россия нашрлари вазирликдан олинган маълумотга таянган ҳолда хабар қилишмоқда.
Бу ерда гап Nissan ширкатининг Петербургдаги заводи ҳамда уни сотиш ҳақида бормоқда. Nissan’нинг кетиши ҳам, қайд этилишича, Россиядан Франциянинг Renault ширкати кетишига ўхшаш бўлади.
Петербургдаги Nissan заводи автомобиль ишлаб чиқаришни 2009 йилда бошлаган. 2021 йил мобайнида завод ишлаб чиқаришни 17 фоизга (45 минг дона машина) оширган.
Ўтган йили Россияда Nissan русумли 51,5 мингга яқин автомобиль сотилган. Унинг бозордаги улуши 3,1 фоизга тенг бўлган.