Ўзбекистонда кам қувватли атом электростанцияси (КҚАЭС) қуриш лойиҳаси бўйича халқаро консорциум тузилади. Бу ҳақда “Ўзатом” агентлиги директори Азим Аҳмадхўжаев маълум қилган.
2024 йил май ойида “Ўзатом”нинг АЭС қуриш дирекцияси ва “Росатом” тизимидаги инжиниринг ширкат ўртасида Ўзбекистонда КҚАЭС барпо этиш бўйича шартнома тузилган эди. 330 МВт қувватли (ҳар бири 55 МВт қувватга эга олтита ректор) КҚАЭС Жиззах вилоятида барпо этилиши, бу лойиҳада “Росатом” бош пудратчи бўлиши билдирилганди.
“Ўзатом” агентлиги директори “Ўзбекистон 24” телеканалига берган интервьюсидан Тошкент эндиликда ушбу лойиҳага бошқа давлатларни ҳам жалб этишни кўзлаётгани англашилади.
“Президентимиз ушбу лойиҳани халқаро хусусиятга эга бўлиши ва унинг амалга оширилишида турли халқаро тузилмаларни жалб қилиш кераклигини таъкидлади. Шунинг учун бу лойиҳада нафақат Россия технологиялари, балки Хитойнинг ноядро технологиялари, Европанинг турли дастурий таъминот ва аппарат воситаларини ҳам қўлламоқчимиз. Шу йўл билан биз энг замонавий технологиялар ёрдамида ушбу лойиҳани амалга ошириш учун халқаро консорциум ташкил қиламиз”, деган Аҳмадхўжаев.
Агентлик раҳбарига кўра, сув сарфини камайтириш мақсадида лойиҳада Венгрия ёки Хитойнинг қуруқ совутгичларини татбиқ этиш режалаштирилган.
“Ўзатом” раҳбари Халқаро атом энергияси агентлиги билан малакали кадрлар тайёрлаш ва атом энергетикаси лойиҳаларини амалга ошириш жараёнида хавфсизликни таъминлаш бўйича ҳамкорлик дастури ишлаб чиқилганини ҳам қайд этган.
Озодлик аввал хабар қилганидек, расмий Тошкент КҚАЭС қуриш учун хориж банкларидан маблағ жалб этиш режасини очиқлаганди.
Дунё узра Путиннинг ядровий таҳдиди муаллақ турган паллада Ўзбекистон Россия билан биргаликда КҚАЭС қуришга киришаётгани маҳаллий фаолларнинг эътирозига сабаб бўлган. Жамоатчилик бу лойиҳа Кремль қўлида Ўзбекистонга қарши “шантаж қуроли” бўлиб қолишидан хавотирда.
АҚШнинг Тошкентдаги элчиси Жонатан Хеник ҳам Ўзбекистон ҳукуматини илк атом электростанцияси қурилишида техник ҳамкорларни танлашда ўта эҳтиёткор бўлишга чақирганди.