Ўзбекистон Олий Мажлиси Қонунчилик палатаси спикери ўринбосари Одилжон Тожиев пора билан қўлга тушган судья ва прокурорлар юритувида бўлган ишларни қайта кўриб чиқиш таклифини ўртага ташлади.
Бу таклифни депутат Когон тумани прокурори пора билан қўлга олинганига оид хабарга изоҳ ўлароқ ёзган постида киритган.
Аввалроқ Озодлик Когон тумани прокурори Баҳодир Ғуломов пора ўлароқ 90 минг доллар олаётган пайтда ДХХ ходимлари томонидан қўлга олингани ҳақида хабар қилган эди.
Одилжон Тожиев ўз Телеграм-каналидаги постида олдинроқ Мингбулоқ туман суди раиси ҳам пора билан ушлаганини эслатиб ўтган ва бу каби ҳолатлар одамларнинг “қонунларга, пировардида эса давлатга бўлган ишончни йўқолиши”га сабаб бўлишини урғулаган.
“Шу боис бундай шахсларнинг жиноятига баҳо беришда уларнинг ўтган фаолияти давомида фуқароларга нисбатан тасдиқлаган айблов хулосалари ва қабул қилган қарорларига ҳам баҳо берилиши керак. Чунки бу каби нолойиқ шахсларнинг ҳаракатлари оқибатида қанчадан-қанча фуқаролар ноҳақ айбланиб, ноҳақ судланиб кетган бўлиши мумкин”, деб ёзган депутат порахўр судья ва прокурорлар “кўриб чиққан барча материаллар кўтарилиб, қайта кўриб чиқилиши шарт”лиги, “шунда адолат тикланиши”ни қўшимча қилган.