Олмаота суди январь воқеалари чоғида оммавий тартибсизликларда иштирок этганликда айбланган ўзбекистонлик этник қозоқ Сакен Талиповга бир йиллик шартли қамоқ жазоси тайинлади. Январдан бери тергов ҳибсхонасида сақланаётган Талипов суд залидан озодликка чиқди, дея хабар қилди Озодликнинг қозоқ хизмати.
Онаси Камшат Дербишалиевага кўра, Талипов ҳибсда қийноққа солинган бўлиб, тиббий ёрдамга муҳтож.
“Ўғлимни врачга кўрсатишим керак. Унинг қийноққа солинганига доир ишни ёпиб юборишган экан. Адвокат шикоят ёзди, энди иш судда кўрилишини кутяпмиз”, деган у.
Сакен Талипов ўтган йилнинг кузида Олмаотага – онасининг ёнига кўчиб келган. Қариндошлари айтишича, у 4 январь куни “Алмати арена” саройи ёнида бўлаётган тинч митингга чиққан ва оломонга қўшилиб ҳокимият биносига қадар борган. Терговга кўра, Сакен полиция қалқони ва резина таёғини қўлига олгани видеокамерага тушган ва шундан сўнг у қамоққа олинган.
Талиповнинг онаси ўғли шаҳарни яхши билмаслигини, митингга эса уни дўсти бошлаб борганини айтган.
Аввалроқ Ўзбекистоннинг Олмаотадаги бош консулхонаси Сакен Талипов билан боғлиқ вазият муносабати билан нота йўллаган эди.
Қозоғистонда январь воқеалари чоғида ўндан ортиқ чет эл фуқароси қўлга олингани маълум қилинган. Шунингдек, Қирғизистоннинг икки ва Ўзбекистоннинг бир фуқароси қурбон бўлгани билдирилган.
Қозоғистон ҳукумати қонли январь воқеаларини аллақандай “ташқи кучлар” уюштирганини иддао қилиб келади. Расмий баёнотларда Марказий Осиё мамлакатларидан бирида тайёрланган террорчилар ҳақида гап борган эди, аммо мамлакат номи очиқланмаган, бунга оид далиллар ҳам намойиш этилмаган.