Россиянинг Пенза вилоятида 11 январь куни юз берган автотўқнашувда ҳалок бўлган 7 нафар ўзбекистонлик жасади Мудофаа вазирлигининг махсус самолётида ватанига олиб келинади.
Ўзбекистон Фавқулодда вазиятлар вазирлигининг билдиришича, бу борада президент Фавқулодда вазиятлар, Ташқи ишлар, Ички ишлар, Соғлиқни сақлаш ва Транспорт вазирликлари, Ташқи меҳнат миграцияси агентлиги ва бошқа тегишли ташкилотларга топшириқ берган.
Вазирликнинг маълум қилишича, автотўқнашув чоғида яна икки нафар ўзбекистонлик жароҳатланган. Айни пайтда улар Пензадаги касалхоналардан бирига ётқизилган.
11 январда Озодлик Пенза вилояти Нижнеломовск туманида юз берган автотўқнашувда етти нафар Ўзбекистон фуқароси ҳалок бўлгани ҳақида хабар берган эди.
Россия Тергов қўмитасининг билдиришича, JAC минивени ҳайдовчиси бўлган 1981 йилда туғилган шахс Москва томонга ҳаракатланиб кетаётган пайтда қарши йўналиш йўлига чиқиб кетган ва Volvo юк машинаси билан тўқнашган.
Мазкур ҳодиса юзасидан Россия Жиноят Кодексининг 238 -моддаси 3-банди (Истеъмолчилар хавфсизлиги ва соғлиғини таъминлаш талабига жавоб бермайдиган равишда хизмат кўрсатиш ва эҳтиётсизлик оқибатида икки ва ундан кўп одамларнинг ўлимига сабабчи бўлиш) асосида жиноят иши қўзғатилди.
Пензада ҳалок бўлган ўзбекистонликлар Мудофаа вазирлиги самолёти билан олиб келинади
Пензадаги автоҳалокат. Пенза вилоят прокуратураси фотоси.