Миллиардер Алишер Усмоновнинг USM холдинги VK ни (собиқ Mail.ru Group) назорат қилувчи ширкат акцияларининг назорат пакетини “Согаз” суғурта гуруҳига сотди. “Согаз”нинг энг йирик ҳиссадорлари эса Владимир Путиннинг дўсти Юрий Ковальчук ва оиласи, Путиннинг жияни Михаил Шеломов ҳамда “Газпром” ширкати саналади.
VK гуруҳи Россиядаги “ВКонтакте” ва “Одноклассники” ижтимоий тармоқлари, mail.ru почтаси ҳамда “Самокат” етказиб бериш хизматига эгалик қилади. Шунингдек, унинг Delivery Club, “Ситимобил” ва бошқа сервисларда ҳам улуши бор. Гуруҳ қиймати 4,5 миллиард доллардан кўпроққа баҳоланган.
USM “Согаз”га VKда 57,3 фоизлик ҳиссага эга “МФ технологии” ширкати капиталидаги 45 фоизлик улушини сотган. Аммо шартнома қиймати очиқланмаган. Ноябрь ойида “МФ” акцияларининг 36 фоизи Сбербанк томонидан Газпромбанкка 12,8 миллиард рублга сотилган эди.
2020 йилда VK гуруҳи, Forbes журнали талқинига кўра, Россиянинг энг йирик ширкатлари рўйхатида тўртинчи ўринни эгаллаган. “Карантинда ўтган йил интернет-ширкатлар учун ниҳоятда муваффақиятли кечди”, дея таъкидлаган Forbes.
VKнинг ўз ҳисоботига кўра, ширкатнинг ялпи тушуми 2021 йил учинчи чорагида ўтган йилнинг шу даврига нисбатан 19 фоизга ўсиб, 30,41 миллиард рублни ташкил қилган. Холдинг энг кўп даромадини реклама ва ўйин бизнесидан топган.
2020 йил декабрида “Проект” нашри ўз суриштирувида Юрий Ковальчукни президент ҳаётининг энг сирли жиҳатлари учун масъул шахс ва “мамлакатдаги нуфузи бўйича иккинчи одам” деб атаган.