Қирғизистон расмийлари шу йил 17 октябридан бошлаб кўмир экспортига вақтинчалик тақиқ жорий этишмоқчи. Бу ҳақда Қирғизистон энергетика вазири Таалайбек Ибраев Бишкекда бўлиб ўтган матбуот анжуманида маълум қилди.
Мулозимга кўра, мазкур қарор кўмир танқислигининг олдини олиш мақсадида қабул қилинган. Ибраев айни пайтда мамлакатда ёқилғининг бу тури бўйича танқислик сезилмаётганини қайд этган.
Аввалроқ қирғиз расмийлари мамлакат жанубидаги конлардан қазиб олинган кўмир Тожикистонга экспорт қилинмай қўйганини очиқлашган эди. Уларга кўра, сўнгги пайтларда Сулукта конларидан қазиб олинаётган кўмир асосан Ўзбекистонга экспорт қилиб келинган.