Қирғизистон четдан электр энергияси сотиб олишни вақтинча тўхтатди. Бу ҳақда мамлакат энергетика вазири Дўсқул Бекмурзаев 15 ноябрь куни Озодликнинг қирғиз хизматига маълум қилган.
Вазир қўшни мамлакатларда электр энергияси етишмовчилиги сабабли чекловлар жорий этилганини урғулаган.
“Импорт масаласида бошқа мамлакатлар, хусусан Россия билан музокаралар ҳануз олиб борилмоқда. Лекин бошқа мамлакатларда ҳам қийинчиликлар мавжуд. Ҳозир кунда импорт тўхтатилган, биз ўзимизда ишлаб чиқарилган қувватдан фойдаланяпмиз. Ўзбекистонда электр узатиш линияларида авария юз берган, қолаверса, чанг бўронидан сўнг иссиқлик станциялари таъмирланяпти. Бу фақат техник сабаблар, уларни сиёсийлаштирмаслик керак. Туркманистондан 1 августдан бери электр энергияси олаётгандик, аммо авариялар туфайли узатув вақтинча тўхтаб қолди, яқин кунларда муаммо ҳал бўлади”, деган Бекмурзаев.
Жорий йилда Тўқтағул сув омборида сув сатҳи пасайиб кетгани сабабли Қирғизистон сўнгги йиллардаги энг катта энергетика инқирозига дуч келган.
Вазиятдан чиқиш учун Қирғизистон алмашиш йўли билан Қозоғистон ва Ўзбекистондан электр энергияси олган, шунингдек Туркманистондан импорт қилган. Бундан ташқари, ҳукумат Россиядан электр энергияси олиш бўйича музокара олиб борилаётганини маълум қилган.
Президент Садир Жапаров 2024-2025 йилларда мамлакат энергия тизими инқироздан чиқишини ва электр энергиясини экспорт қилишни бошлашини айтган. Бунинг учун ҳукумат кичик ва ўртача ГЭСлар қуришга киришган.