Жорий йилнинг 4 январь куни Ўзбекистон ташқи ишлар вазири ўринбосари Раҳматулла Нуримбетов Россиянинг Ўзбекистондаги элчиси Олег Мальгинов билан учрашув ўтказган.
ТИВ матбуот хизмати маълумотига кўра, учрашув чоғида "Ўзбекистон-Россия кенг қамровли стратегик шериклик ва иттифоқчилик муносабатларининг долзарб масалалари" муҳокама қилинган.
Бу Россия элчисининг сўнгги икки ҳафта ичида Ўзбекистон ТИВ мулозими билан ўтказган иккинчи учрашувидир. Элчи Олег Мальгинов 2023 йилнинг 21 декабрь куни ҳам Ташқи ишлар вазирлигига таклиф этилган, бунга "Справедливая Россия — за правду" партияси ҳамраиси Захар Прилепиннинг Ўзбекистон ҳудудини Россияга қўшиб олиш зарурлиги ҳақидаги баёноти сабаб бўлган эди.
Ўшанда Прилепиннинг мазкур баёноти Ўзбекистон ТИВ томонидан “провокация” ўлароқ баҳоланган, элчи Мальгинов эса “Прилепиннинг баёнотлари Россия раҳбариятининг дўст ва мустақил Ўзбекистон тўғрисидаги расмий позициясига умуман алоқаси йўқлиги"ни таъкидлаган эди.
Захар Прилепиннинг ўтган йил 20 декабрида “Россия сегодня” матбуот марказида бўлиб ўтган анжуманда: "Мен самимий айтяпман, гастарбайтерлар келаётган мамлакатларни қўшиб олишимиз керак ва уларга ўша ернинг ўзида, бу ерда эмас, ўша ёқда рус тилини ўргатишимиз керак, масалан, Ўзбекистонда” деган гаплари залда ўтирганлар томонидан олқиш ва қарсаклар билан кутиб олинган бўлса-да, Ўзбекистон жамоатчилиги томонидан салбий қарши олинди.
Жамоатчиликнинг бу реакциясидан кейин 22 декабрь куни Ўзбекистон президенти Шавкат Мирзиёев Республика Маънавият ва маърифат кенгаши йиғилишида “босимлар” ортидан мамлакат учун манфаатли бўлган “тўғри йўлни топиш” осон бўлмаётганини тан олган.
Бу эътирофдан сўнг Олий Мажлис Сенати раиси Танзила Норбоева ҳам Прилепиннинг Ўзбекистонни Россияга қўшиб олиш тўғрисидаги баёнотига муносабат билдирган.
“Мана кўряпсизлар, интернетда “Ўзбекистонни у қиламиз, бу қиламиз”, деган қандайдир чиқишлар бўлиб кетди, тўғрими? Ўзбекистон ҳеч қачон ҳеч кимга мустамлака бўлмайди бундан кейин, бўлиб бўлди. Сизлар буни биласизлар, бу нарсани сизларга тарғибот қилишим керак эмас. Ҳаммангизнинг юрагингизда шу бор”, деб айтганди Норбоева 25 декабрь куни ёшлар билан ўтказилган учрашувда.