Молдова президенти Майя Санду Кишенёвда 13 февраль куни ўтган матбуот анжуманида Россия республикада ҳукуматни ўзгартиришни ва ҳокимиятга ўзи дастаклаган шахсларни олиб келишни истайди деб баёнот берди.
Озодлик радиоси молдован хизматининг хабар беришича, президент Москва Молдовада вазиятни беқарорлаштириш режасини ишлаб чиқанини айтди. Унга кўра, бу режани ўтган ҳафтада Украина махсус хизмати Кишенёвга тақдим этган.
Сандунинг айтишича, режага асосан Россия гўёки мухолифат кучларининг “норозилик акциялари”ни ўтказиб, давлат идораларига ҳужум қилишни ва хизматчиларни гаровга олишни режалаштирган. Санду иддаосича, бу ҳаракатлар учун Россиядан, Беларусдан, Сербия ва Черногориядан “фуқаролик кийимидаги ҳарбий тайёргарликдан ўтган диверсантлар жалб қилинади”.
Президентга кўра, Россиянинг мақсади мамлакатнинг Европага интеграциясини тўхтатиш ва Украинага қарши урушда Молдовадан фойдаланишдир.
Москва ҳозирча Сандунинг мазкур баёнотига муносабат билдирмади.
