Россияда мухолифатчи Илья Яшинга қарши “армия ҳақида фейклар тарқатиш” моддаси бўйича жиноят иши қўзғатилди. Унинг Москвадаги уйида тинтув ўтказилди. Бу ҳақда Озодликнинг рус хизмати Яшиннинг адвокати Вадим Прохоров сўзларига таянган ҳолда хабар қилди.
ОВД-Инфо Михаил Бирюков исмли бошқа адвокат сўзларига таяниб, жиноят ишига Яшиннинг 7 апрель куни Youtube тармоғидаги ёйини сабаб бўлганини маълум қилган. Унда сиёсатчи Украинанинг Буча шаҳридаги оммавий хунрезликлар ҳақида гапирган ва бунда Россия аскарларини айблаб, Би-би-си ушбу шаҳарда суратга олган видеодан иқтибослар келтирган. Мухолифатчига 10 йилгача қамоқ жазоси хавф солмоқда.
Илья Яшин – Алексей Навальний тарафдорларига қарши қатағонлар ва Украинага босқин бошланганидан сўнг мамлакатни тарк этмаган кам сонли таниқли мухолифатчилардан биридир. У урушга очиқчасига қарши чиққан ва президент Владимир Путинни босқинчилик сиёсати юритаётганликда айблаган.
Яшин 28 июнь куни полицияга бўйсунмаганликка доир маъмурий иш бўйича 15 суткага қамоққа олинган. У тунда, Москва марказидаги хиёбонда сайр қилиб юрган пайтда тутиб кетилган. Яшиннинг ўзи қўлга олиш чоғида қаршилик қилмаганини айтган. 13 июлга ўтар кечаси у қамоқ муддати тугаши муносабати билан озодликка чиқиши керак эди.
Ўтган ҳафтада армия ҳақида фейклар тарқатиш моддаси бўйича Яшиннинг муниципал кенгашдаги ҳамкасби Алексей Горинов 7 йилга озодликдан маҳрум этилган. Бу мазкур модда бўйича тайинланган биринчи реал қамоқ жазосидир.
Аввалроқ Яшин уни Россиядан кетишга мажбур қилишаётганини, аммо ўзи буни хоҳламаслигини таъкидлаган эди. Журналист Юрий Дудь бир ойча муқаддам Яшиндан интервью олганида ундан “қамоққа тушишга тайёрмисиз?” деб сўраган.
Ўтган йилнинг январидан бери қамоқ жазосини ўтаётган мухолифатчи Алексей Навальний Яшиннинг тақдиридан хавотирда эканини ёзган. Аввалроқ ушбу схема бўйича, яъни дастлаб маъмурий, сўнгра жиноий иш очиш йўли билан мухолифатчи Владимир Кара-Мурза ҳам қамалган эди.
Россияда армия ҳақида фейклар тарқатиш моддаси бўйича 70 дан зиёд жиноят иши очилган. Тергов идораси Украинадаги ҳарбий ҳаракатларга оид Россия Мудофаа вазирлиги позициясига зид ҳар қандай маълумотни “ёлғон” деб ҳисобламоқда. Хусусан, Россия ҳарбийлари ўққа тутиши натижасида Украинада тинч аҳоли нобуд бўлганидан баҳс этган кишилар ҳам жиноий жавобгарликка тортилган.